1 Sāvatthiyaṃ viharati. Atha kho āyasmā upavāṇo yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upavāṇo bhagavantaṃ etadavoca: 

2 "Santi pana, bhante, eke samaṇabrāhmaṇā sayankataṃ dukkhaṃ paññapenti. Santi pana, bhante, eke samaṇabrāhmaṇā parankataṃ dukkhaṃ paññapenti. Santi pana, bhante, eke samaṇabrāhmaṇā sayankatañca parankatañca dukkhaṃ paññapenti. Santi pana, bhante, eke samaṇabrāhmaṇā asayankāraṃ aparankāraṃ adhiccasamuppannaṃ dukkhaṃ paññapenti. Idha no, bhante, bhagavā kiṃvādī kimakkhāyī kathaṃ byākaramānā ca mayaṃ vuttavādino ceva bhagavato assāma, na ca bhagavantaṃ abhūtena abbhācikkheyyāma, dhammassa cānudhammaṃ byākareyyāma, na ca koci sahadhammiko vādānupāto gārayhaṃ ṭhānaṃ āgaccheyyā"ti?

3 "Paṭiccasamuppannaṃ kho, upavāṇa, dukkhaṃ vuttaṃ mayā. Kiṃ paṭicca? Phassaṃ paṭicca. Iti vadaṃ vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānupāto gārayhaṃ ṭhānaṃ āgaccheyya.

4 Tatra, upavāṇa, ye te samaṇabrāhmaṇā sayankataṃ dukkhaṃ paññapenti, tadapi phassapaccayā. Yepi te … pe … yepi te … pe … yepi te samaṇabrāhmaṇā asayankāraṃ aparankāraṃ adhiccasamuppannaṃ dukkhaṃ paññapenti tadapi phassapaccayā.

5 Tatra, upavāṇa, ye te samaṇabrāhmaṇā sayankataṃ dukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjati. Yepi te … pe … yepi te … pe … yepi te samaṇabrāhmaṇā asayankāraṃ aparankāraṃ adhiccasamuppannaṃ dukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjatī"ti.

Chaṭṭhaṃ.