1 "Aṭṭhime, bhikkhave, puggalā āhuneyyā … pe … anuttaraṃ puññakkhettaṃ lokassa. Katame aṭṭha? Sotāpanno, sotāpattiphalasacchikiriyāya paṭipanno … pe … arahā, arahattāya paṭipanno. Ime kho, bhikkhave, aṭṭha puggalā āhuneyyā … pe … anuttaraṃ puññakkhettaṃ lokassāti.

2 Cattāro ca paṭipannā,
cattāro ca phale ṭhitā;
Esa sangho samukkaṭṭho,
sattānaṃ aṭṭha puggalā.

3 Yajamānānaṃ manussānaṃ,
puññapekkhāna pāṇinaṃ;
Karotaṃ opadhikaṃ puññaṃ,
ettha dinnaṃ mahapphalan"ti.

Dasamaṃ.

Gotamīvaggo paṭhamo.

4 Gotamī ovādaṃ sankhittaṃ,
dīghajāṇu ca ujjayo;
Bhayā dve āhuneyyā ca,
dve ca aṭṭha puggalāti.