1 "‘Bhayan’ti, bhikkhave, kāmānametaṃ adhivacanaṃ. ‘Dukkhan’ti, bhikkhave, kāmānametaṃ adhivacanaṃ. ‘Rogo’ti, bhikkhave, kāmānametaṃ adhivacanaṃ. ‘Gaṇḍo’ti, bhikkhave, kāmānametaṃ adhivacanaṃ. ‘Sallan’ti, bhikkhave, kāmānametaṃ adhivacanaṃ. ‘Sango’ti, bhikkhave, kāmānametaṃ adhivacanaṃ. ‘Panko’ti, bhikkhave, kāmānametaṃ adhivacanaṃ. ‘Gabbho’ti, bhikkhave, kāmānametaṃ adhivacanaṃ. Kasmā ca, bhikkhave, ‘bhayan’ti kāmānametaṃ adhivacanaṃ? Yasmā ca kāmarāgarattāyaṃ, bhikkhave, chandarāgavinibaddho diṭṭhadhammikāpi bhayā na parimuccati, samparāyikāpi bhayā na parimuccati, tasmā ‘bhayan’ti kāmānametaṃ adhivacanaṃ. Kasmā ca, bhikkhave, ‘dukkhan’ti … pe … ‘rogo’ti … ‘gaṇḍo’ti … ‘sallan’ti … ‘sango’ti … ‘panko’ti … ‘gabbho’ti kāmānametaṃ adhivacanaṃ? Yasmā ca kāmarāgarattāyaṃ, bhikkhave, chandarāgavinibaddho diṭṭhadhammikāpi gabbhā na parimuccati, samparāyikāpi gabbhā na parimuccati, tasmā ‘gabbho’ti kāmānametaṃ adhivacanaṃ.

2 Bhayaṃ dukkhañca rogo ca,
gaṇḍo sallañca sango ca;
Panko gabbho ca ubhayaṃ,
ete kāmā pavuccanti;
Yattha satto puthujjano.

3 Otiṇṇo sātarūpena,
puna gabbhāya gacchati;
Yato ca bhikkhu ātāpī,
sampajaññaṃ na riccati.

4 So imaṃ palipathaṃ duggaṃ,
atikkamma tathāvidho;
Pajaṃ jātijarūpetaṃ,
phandamānaṃ avekkhatī"ti.

Chaṭṭhaṃ.