1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi:  "bhikkhavo"ti. "Bhadante"ti te bhikkhū bhagavato paccassosuṃ. Bhagavā etadavoca: 

2 "Aṭṭhangasamannāgato, bhikkhave, uposatho upavuttho mahapphalo hoti mahānisaṃso mahājutiko mahāvipphāro. Kathaṃ upavuttho ca, bhikkhave, aṭṭhangasamannāgato uposatho mahapphalo hoti mahānisaṃso mahājutiko mahāvipphāro? Idha, bhikkhave, ariyasāvako iti paṭisañcikkhati:  ‘yāvajīvaṃ arahanto pāṇātipātaṃ pahāya pāṇātipātā paṭiviratā nihitadaṇḍā nihitasatthā lajjī dayāpannā, sabbapāṇabhūtahitānukampino viharanti. Ahampajja imañca rattiṃ imañca divasaṃ pāṇātipātaṃ pahāya pāṇātipātā paṭivirato nihitadaṇḍo nihitasattho lajjī dayāpanno, sabbapāṇabhūtahitānukampī viharāmi. Imināpangena arahataṃ anukaromi, uposatho ca me upavuttho bhavissatī’ti. Iminā paṭhamena angena samannāgato hoti. (1)

3 ‘Yāvajīvaṃ arahanto adinnādānaṃ pahāya adinnādānā paṭiviratā dinnādāyī dinnapāṭikankhī, athenena sucibhūtena attanā viharanti. Ahampajja imañca rattiṃ imañca divasaṃ adinnādānaṃ pahāya adinnādānā paṭivirato dinnādāyī dinnapāṭikankhī, athenena sucibhūtena attanā viharāmi. Imināpangena arahataṃ anukaromi, uposatho ca me upavuttho bhavissatī’ti. Iminā dutiyena angena samannāgato hoti. (2)

4 ‘Yāvajīvaṃ arahanto abrahmacariyaṃ pahāya brahmacārino ārācārino viratā methunā gāmadhammā. Ahampajja imañca rattiṃ imañca divasaṃ abrahmacariyaṃ pahāya brahmacārī ārācārī virato methunā gāmadhammā. Imināpangena arahataṃ anukaromi, uposatho ca me upavuttho bhavissatī’ti. Iminā tatiyena angena samannāgato hoti. (3)

5 ‘Yāvajīvaṃ arahanto musāvādaṃ pahāya musāvādā paṭiviratā saccavādino saccasandhā thetā paccayikā avisaṃvādako lokassa. Ahampajja imañca rattiṃ imañca divasaṃ musāvādaṃ pahāya musāvādā paṭivirato saccavādī saccasandho theto paccayiko avisaṃvādako lokassa. Imināpangena arahataṃ anukaromi, uposatho ca me upavuttho bhavissatī’ti. Iminā catutthena angena samannāgato hoti. (4)

6 ‘Yāvajīvaṃ arahanto surāmerayamajjapamādaṭṭhānaṃ pahāya surāmerayamajjapamādaṭṭhānā paṭiviratā. Ahampajja imañca rattiṃ imañca divasaṃ surāmerayamajjapamādaṭṭhānaṃ pahāya surāmerayamajjapamādaṭṭhānā paṭivirato. Imināpangena arahataṃ anukaromi, uposatho ca me upavuttho bhavissatī’ti. Iminā pañcamena angena samannāgato hoti. (5)

7 ‘Yāvajīvaṃ arahanto ekabhattikā rattūparatā viratā vikālabhojanā. Ahampajja imañca rattiṃ imañca divasaṃ ekabhattiko rattūparato virato vikālabhojanā. Imināpangena arahataṃ anukaromi, uposatho ca me upavuttho bhavissatī’ti. Iminā chaṭṭhena angena samannāgato hoti. (6)

8 ‘Yāvajīvaṃ arahanto naccagītavāditavisūkadassanamālā­gandha­vilepana­dhāraṇa­maṇḍana­vibhūsanaṭṭhānaṃ pahāya naccagītavāditavisūkadassanamālā­gandha­vilepana­dhāraṇa­maṇḍana­vibhūsanaṭṭhānā paṭiviratā. Ahampajja imañca rattiṃ imañca divasaṃ naccagītavāditavisūkadassanamālā­gandha­vilepana­dhāraṇa­maṇḍana­vibhūsanaṭṭhānaṃ pahāya naccagītavāditavisūkadassanamālā­gandha­vilepana­dhāraṇa­maṇḍana­vibhūsanaṭṭhānā paṭivirato. Imināpangena arahataṃ anukaromi, uposatho ca me upavuttho bhavissatī’ti. Iminā sattamena angena samannāgato hoti. (7)

9 ‘Yāvajīvaṃ arahanto uccāsayanamahāsayanaṃ pahāya uccāsayanamahāsayanā paṭiviratā nīcaseyyaṃ kappenti – mañcake vā tiṇasanthārake vā. Ahampajja imañca rattiṃ imañca divasaṃ uccāsayanamahāsayanaṃ pahāya uccāsayanamahāsayanā paṭivirato nīcaseyyaṃ kappemi – mañcake vā tiṇasanthārake vā. Imināpangena arahataṃ anukaromi, uposatho ca me upavuttho bhavissatī’ti. Iminā aṭṭhamena angena samannāgato hoti. (8)

10 Evaṃ upavuttho kho, bhikkhave, aṭṭhangasamannāgato uposatho mahapphalo hoti mahānisaṃso mahājutiko mahāvipphāro"ti.

Paṭhamaṃ.