1 Ekaṃ samayaṃ bhagavā āḷaviyaṃ viharati aggāḷave cetiye. Atha kho hatthako āḷavako pañcamattehi upāsakasatehi parivuto yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho hatthakaṃ āḷavakaṃ bhagavā etadavoca:  "mahatī kho tyāyaṃ, hatthaka, parisā. Kathaṃ pana tvaṃ, hatthaka, imaṃ mahatiṃ parisaṃ sangaṇhāsī"ti? "Yānimāni, bhante, bhagavatā desitāni cattāri sangahavatthūni, tehāhaṃ imaṃ mahatiṃ parisaṃ sangaṇhāmi. Ahaṃ, bhante, yaṃ jānāmi:  ‘ayaṃ dānena sangahetabbo’ti, taṃ dānena sangaṇhāmi; yaṃ jānāmi:  ‘ayaṃ peyyavajjena sangahetabbo’ti, taṃ peyyavajjena sangaṇhāmi; yaṃ jānāmi:  ‘ayaṃ atthacariyāya sangahetabbo’ti, taṃ atthacariyāya sangaṇhāmi; yaṃ jānāmi:  ‘ayaṃ samānattatāya sangahetabbo’ti, taṃ samānattatāya sangaṇhāmi. Saṃvijjanti kho pana me, bhante, kule bhogā. Daliddassa kho no tathā sotabbaṃ maññantī"ti. "Sādhu sādhu, hatthaka. Yoni kho tyāyaṃ, hatthaka, mahatiṃ parisaṃ sangahetuṃ. Ye hi keci, hatthaka, atītamaddhānaṃ mahatiṃ parisaṃ sangahesuṃ, sabbe te imeheva catūhi sangahavatthūhi mahatiṃ parisaṃ sangahesuṃ. Yepi hi keci, hatthaka, anāgatamaddhānaṃ mahatiṃ parisaṃ sangaṇhissanti, sabbe te imeheva catūhi sangahavatthūhi mahatiṃ parisaṃ sangaṇhissanti. Yepi hi keci, hatthaka, etarahi mahatiṃ parisaṃ sangaṇhanti, sabbe te imeheva catūhi sangahavatthūhi mahatiṃ parisaṃ sangaṇhantī"ti.

2 Atha kho hatthako āḷavako bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā acirapakkante hatthake āḷavake bhikkhū āmantesi:  "aṭṭhahi, bhikkhave, acchariyehi abbhutehi dhammehi samannāgataṃ hatthakaṃ āḷavakaṃ dhāretha. Katamehi aṭṭhahi? Saddho, bhikkhave, hatthako āḷavako; sīlavā, bhikkhave … pe … hirīmā … ottappī … bahussuto … cāgavā … paññavā, bhikkhave, hatthako āḷavako; appiccho, bhikkhave, hatthako āḷavako. Imehi kho, bhikkhave, aṭṭhahi acchariyehi abbhutehi dhammehi samannāgataṃ hatthakaṃ āḷavakaṃ dhārethā"ti.

Catutthaṃ.