1 Evaṃ me sutaṃ—​   ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi:  "sattime, bhikkhave, dhammā sekhassa bhikkhuno parihānāya saṃvattanti. Katame satta? Kammārāmatā, bhassārāmatā, niddārāmatā, sangaṇikārāmatā, indriyesu aguttadvāratā, bhojane amattaññutā, santi kho pana sanghe sanghakaraṇīyāni; tatra sekho bhikkhu iti paṭisañcikkhati:  ‘santi kho pana sanghe therā rattaññū cirapabbajitā bhāravāhino, te tena paññāyissantī’ti attanā tesu yogaṃ āpajjati. Ime kho, bhikkhave, satta dhammā sekhassa bhikkhuno parihānāya saṃvattanti.

2 Sattime, bhikkhave, dhammā sekhassa bhikkhuno aparihānāya saṃvattanti. Katame satta? Na kammārāmatā, na bhassārāmatā, na niddārāmatā, na sangaṇikārāmatā, indriyesu guttadvāratā, bhojane mattaññutā, santi kho pana sanghe sanghakaraṇīyāni; tatra sekho bhikkhu iti paṭisañcikkhati:  ‘santi kho pana sanghe therā rattaññū cirapabbajitā bhāravāhino, te tena paññāyissantī’ti attanā na tesu yogaṃ āpajjati. Ime kho, bhikkhave, satta dhammā sekhassa bhikkhuno aparihānāya saṃvattantī"ti.

Aṭṭhamaṃ.