1 "‘Bhayan’ti, bhikkhave, kāmānametaṃ adhivacanaṃ; ‘dukkhan’ti, bhikkhave, kāmānametaṃ adhivacanaṃ; ‘rogo’ti, bhikkhave, kāmānametaṃ adhivacanaṃ; ‘gaṇḍo’ti, bhikkhave, kāmānametaṃ adhivacanaṃ; ‘sango’ti, bhikkhave, kāmānametaṃ adhivacanaṃ; ‘panko’ti, bhikkhave, kāmānametaṃ adhivacanaṃ.

2 Kasmā ca, bhikkhave, ‘bhayan’ti kāmānametaṃ adhivacanaṃ? Kāmarāgarattāyaṃ, bhikkhave, chandarāgavinibaddho diṭṭhadhammikāpi bhayā na parimuccati, samparāyikāpi bhayā na parimuccati, tasmā ‘bhayan’ti kāmānametaṃ adhivacanaṃ. Kasmā ca, bhikkhave, dukkhanti … pe … rogoti … gaṇḍoti … sangoti … pankoti kāmānametaṃ adhivacanaṃ? Kāmarāgarattāyaṃ, bhikkhave, chandarāgavinibaddho diṭṭhadhammikāpi pankā na parimuccati, samparāyikāpi pankā na parimuccati, tasmā ‘panko’ti kāmānametaṃ adhivacananti.

3 Bhayaṃ dukkhaṃ rogo gaṇḍo,
sango panko ca ubhayaṃ;
Ete kāmā pavuccanti,
yattha satto puthujjano.

4 Upādāne bhayaṃ disvā,
jātimaraṇasambhave;
Anupādā vimuccanti,
jātimaraṇasankhaye.

5 Te khemappattā sukhino,
diṭṭhadhammābhinibbutā;
Sabbaverabhayātītā,
sabbadukkhaṃ upaccagun"ti.

Tatiyaṃ.