1 "Pañcimāni, bhikkhave, ṭhānāni sampassantā mātāpitaro puttaṃ icchanti kule jāyamānaṃ. Katamāni pañca? Bhato vā no bharissati; kiccaṃ vā no karissati; kulavaṃso ciraṃ ṭhassati; dāyajjaṃ paṭipajjissati; atha vā pana petānaṃ kālankatānaṃ dakkhiṇaṃ anuppadassatīti. Imāni kho, bhikkhave, pañca ṭhānāni sampassantā mātāpitaro puttaṃ icchanti kule jāyamānanti.

2 Pañca ṭhānāni sampassaṃ,
puttaṃ icchanti paṇḍitā;
Bhato vā no bharissati,
kiccaṃ vā no karissati.

3 Kulavaṃso ciraṃ tiṭṭhe,
dāyajjaṃ paṭipajjati;
Atha vā pana petānaṃ,
dakkhiṇaṃ anuppadassati.

4 Ṭhānānetāni sampassaṃ,
puttaṃ icchanti paṇḍitā;
Tasmā santo sappurisā,
kataññū katavedino.

5 Bharanti mātāpitaro,
pubbe katamanussaraṃ;
Karonti nesaṃ kiccāni,
yathā taṃ pubbakārinaṃ.

6 Ovādakārī bhataposī,
kulavaṃsaṃ ahāpayaṃ;
Saddho sīlena sampanno,
putto hoti pasaṃsiyo"ti.

Navamaṃ.