1 "Pañcime, bhikkhave, ādīnavā puggalappasāde. Katame pañca? Yasmiṃ, bhikkhave, puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā sangho ukkhipati. Tassa evaṃ hoti:  ‘yo kho myāyaṃ puggalo piyo manāpo so sanghena ukkhitto’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, paṭhamo ādīnavo puggalappasāde.

2 Puna caparaṃ, bhikkhave, yasmiṃ puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā sangho ante nisīdāpeti. Tassa evaṃ hoti:  ‘yo kho myāyaṃ puggalo piyo manāpo so sanghena ante nisīdāpito’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, dutiyo ādīnavo puggalappasāde.

3 Puna caparaṃ, bhikkhave, yasmiṃ puggale puggalo abhippasanno hoti, so disāpakkanto hoti … pe … so vibbhanto hoti … pe … so kālankato hoti. Tassa evaṃ hoti:  ‘yo kho myāyaṃ puggalo piyo manāpo so kālankato’ti. Aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, pañcamo ādīnavo puggalappasāde. Ime kho, bhikkhave, pañca ādīnavā puggalappasāde"ti.

Dasamaṃ.

Duccaritavaggo pañcamo.

4 Duccaritaṃ kāyaduccaritaṃ,
Vacīduccaritaṃ manoduccaritaṃ;
Catūhi pare dve sivathikā,
Puggalappasādena cāti.

Pañcamo paṇṇāsako samatto.