Saddhamma Study Group

Anguttara Nikāya - The Numerical Discourses

5: The Book of the Fives

199. Families

  • A Saddhamma Study Group translation from the Pāḷi text (coming sooner or later).

    For more copyright information please see:

1 "Yaṃ, bhikkhave, sīlavanto pabbajitā kulaṃ upasankamanti, tattha manussā pañcahi ṭhānehi bahuṃ puññaṃ pasavanti. Katamehi pañcahi? Yasmiṃ, bhikkhave, samaye sīlavante pabbajite kulaṃ upasankamante manussā disvā cittāni pasādenti, saggasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.

2 Yasmiṃ, bhikkhave, samaye sīlavante pabbajite kulaṃ upasankamante manussā paccuṭṭhenti abhivādenti āsanaṃ denti, uccākulīnasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.

3 Yasmiṃ, bhikkhave, samaye sīlavante pabbajite kulaṃ upasankamante manussā maccheramalaṃ paṭivinenti, mahesakkhasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.

4 Yasmiṃ, bhikkhave, samaye sīlavante pabbajite kulaṃ upasankamante manussā yathāsatti yathābalaṃ saṃvibhajanti, mahābhogasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.

5 Yasmiṃ, bhikkhave, samaye sīlavante pabbajite kulaṃ upasankamante manussā paripucchanti paripañhanti dhammaṃ suṇanti, mahāpaññāsaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti. Yaṃ, bhikkhave, sīlavanto pabbajitā kulaṃ upasankamanti, tattha manussā imehi pañcahi ṭhānehi bahuṃ puññaṃ pasavantī"ti.

Navamaṃ.