Saddhamma Study Group

Anguttara Nikāya - The Numerical Discourses

5: The Book of the Fives

12. Peak (1)

  • A Saddhamma Study Group translation from the Pāḷi text (coming sooner or later).

    For more copyright information please see:

1 "Pañcimāni, bhikkhave, sekhabalāni. Katamāni pañca? Saddhābalaṃ, hirībalaṃ, ottappabalaṃ, vīriyabalaṃ, paññābalaṃ – imāni kho, bhikkhave, pañca sekhabalāni. Imesaṃ kho, bhikkhave, pañcannaṃ sekhabalānaṃ etaṃ aggaṃ etaṃ sangāhikaṃ etaṃ sanghātaniyaṃ, yadidaṃ paññābalaṃ.

2 Seyyathāpi, bhikkhave, kūṭāgārassa etaṃ aggaṃ etaṃ sangāhikaṃ etaṃ sanghātaniyaṃ, yadidaṃ kūṭaṃ. Evamevaṃ kho, bhikkhave, imesaṃ pañcannaṃ sekhabalānaṃ etaṃ aggaṃ etaṃ sangāhikaṃ etaṃ sanghātaniyaṃ, yadidaṃ paññābalaṃ.

3 Tasmātiha, bhikkhave, evaṃ sikkhitabbaṃ:  ‘saddhābalena samannāgatā bhavissāma sekhabalena, hirībalena … ottappabalena … vīriyabalena … paññābalena samannāgatā bhavissāma sekhabalenā’ti. Evañhi vo, bhikkhave, sikkhitabban"ti.

Dutiyaṃ.