Saddhamma Study Group

Anguttara Nikāya - The Numerical Discourses

5: The Book of the Fives

106. Ānanda

  • A Saddhamma Study Group translation from the Pāḷi text (coming sooner or later).

    For more copyright information please see:

1 Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca: 

2 "Kittāvatā nu kho, bhante, bhikkhu sanghe viharanto phāsuṃ vihareyyā"ti? "Yato kho, ānanda, bhikkhu attanā sīlasampanno hoti, no paraṃ adhisīle sampavattā; ettāvatāpi kho, ānanda, bhikkhu sanghe viharanto phāsuṃ vihareyyā"ti.

3 "Siyā pana, bhante, aññopi pariyāyo yathā bhikkhu sanghe viharanto phāsuṃ vihareyyā"ti? "Siyā, ānanda. Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; ettāvatāpi kho, ānanda, bhikkhu sanghe viharanto phāsuṃ vihareyyā"ti.

4 "Siyā pana, bhante, aññopi pariyāyo yathā bhikkhu sanghe viharanto phāsuṃ vihareyyā"ti? "Siyā, ānanda. Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; ettāvatāpi kho, ānanda, bhikkhu sanghe viharanto phāsuṃ vihareyyā"ti.

5 "Siyā pana, bhante, aññopi pariyāyo yathā bhikkhu sanghe viharanto phāsuṃ vihareyyā"ti? "Siyā, ānanda. Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; ettāvatāpi kho, ānanda, bhikkhu sanghe viharanto phāsuṃ vihareyyā"ti.

6 "Siyā pana, bhante, aññopi pariyāyo yathā bhikkhu sanghe viharanto phāsuṃ vihareyyā"ti? "Siyā, ānanda. Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ettāvatāpi kho, ānanda, bhikkhu sanghe viharanto phāsuṃ vihareyya.

7 Imamhā cāhaṃ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī"ti.

Chaṭṭhaṃ.