1 Atha kho āyasmā sāriputto yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ sāriputtaṃ bhagavā etadavoca:  "sankhittenapi kho ahaṃ, sāriputta, dhammaṃ deseyyaṃ; vitthārenapi kho ahaṃ, sāriputta, dhammaṃ deseyyaṃ; sankhittavitthārenapi kho ahaṃ, sāriputta, dhammaṃ deseyyaṃ; aññātāro ca dullabhā"ti. "Etassa, bhagavā, kālo, etassa, sugata, kālo yaṃ bhagavā sankhittenapi dhammaṃ deseyya, vitthārenapi dhammaṃ deseyya, sankhittavitthārenapi dhammaṃ deseyya. Bhavissanti dhammassa aññātāro"ti.

2 "Tasmātiha, sāriputta, evaṃ sikkhitabbaṃ:  ‘imasmiñca saviññāṇake kāye ahankāramamankāramānānusayā na bhavissanti, bahiddhā ca sabbanimittesu ahankāramamankāramānānusayā na bhavissanti, yañca cetovimuttiṃ paññāvimuttiṃ upasampajja viharato ahankāramamankāramānānusayā na honti tañca cetovimuttiṃ paññāvimuttiṃ upasampajja viharissāmā’ti. Evañhi kho, sāriputta, sikkhitabbaṃ.

3 Yato ca kho, sāriputta, bhikkhuno imasmiñca saviññāṇake kāye ahankāramamankāramānānusayā na honti, bahiddhā ca sabbanimittesu ahankāramamankāramānānusayā na honti, yañca cetovimuttiṃ paññāvimuttiṃ upasampajja viharato ahankāramamankāramānānusayā na honti tañca cetovimuttiṃ paññāvimuttiṃ upasampajja viharati; ayaṃ vuccati, sāriputta:  ‘bhikkhu acchecchi taṇhaṃ, vivattayi saṃyojanaṃ, sammā mānābhisamayā antamakāsi dukkhassa’. Idañca pana metaṃ, sāriputta, sandhāya bhāsitaṃ pārāyane udayapañhe: 

4 ‘Pahānaṃ kāmasaññānaṃ,
domanassāna cūbhayaṃ;
Thinassa ca panūdanaṃ,
kukkuccānaṃ nivāraṇaṃ.

5 Upekkhāsatisaṃsuddhaṃ,
dhammatakkapurejavaṃ;
Aññāvimokkhaṃ pabrūmi,
avijjāya pabhedanan’"ti.

Tatiyaṃ.