1 Atha kho āyasmā ānando yena bhagavā tenupasankami; upasankamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca:  "‘sanghabhedo sanghabhedo’ti, bhante, vuccati. Kittāvatā nu kho, bhante, sangho bhinno hotī"ti? "Idhānanda, bhikkhū adhammaṃ dhammoti dīpenti, dhammaṃ adhammoti dīpenti, avinayaṃ vinayoti dīpenti … pe … paññattaṃ tathāgatena apaññattaṃ tathāgatenāti dīpenti. Te imehi dasahi vatthūhi avakassanti apakassanti āveni kammāni karonti āveni pātimokkhaṃ uddisanti. Ettāvatā kho, ānanda, sangho bhinno hotī"ti.

2 "Samaggaṃ pana, bhante, sanghaṃ bhinditvā kiṃ so pasavatī"ti? "Kappaṭṭhikaṃ, ānanda, kibbisaṃ pasavatī"ti. "Kiṃ pana, bhante, kappaṭṭhikaṃ kibbisan"ti? "Kappaṃ, ānanda, nirayamhi paccatīti – 

3 Āpāyiko nerayiko,
Kappaṭṭho sanghabhedako;
Vaggarato adhammaṭṭho,
Yogakkhemā padhaṃsati;
Sanghaṃ samaggaṃ bhinditvā,
Kappaṃ nirayamhi paccatī"ti.

Navamaṃ.