1 "Pañcangasamannāgato, bhikkhave, bhikkhu pañcangasamannāgataṃ senāsanaṃ sevamāno bhajamāno nacirasseva āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya.

2 Kathañca, bhikkhave, bhikkhu pañcangasamannāgato hoti? Idha, bhikkhave, bhikkhu saddho hoti; saddahati tathāgatassa bodhiṃ:  ‘itipi so bhagavā … pe … bhagavā’ti; appābādho hoti appātanko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya; asaṭho hoti amāyāvī, yathābhūtaṃ attānaṃ āvikattā satthari vā viññūsu vā sabrahmacārīsu; āraddhavīriyo viharati, akusalānaṃ dhammānaṃ pahānāya, kusalānaṃ dhammānaṃ upasampadāya; thāmavā daḷhaparakkamo anikkhittadhuro kusalesu dhammesu; paññavā hoti, udayatthagāminiyā paññāya samannāgato ariyāya nibbedhikāya sammā dukkhakkhayagāminiyā. Evaṃ kho, bhikkhave, bhikkhu pañcangasamannāgato hoti.

3 Kathañca, bhikkhave, senāsanaṃ pañcangasamannāgataṃ hoti? Idha, bhikkhave, senāsanaṃ nātidūraṃ hoti nāccāsannaṃ gamanāgamanasampannaṃ divā appākiṇṇaṃ rattiṃ appasaddaṃ appanigghosaṃ appaḍaṃsa­makasa­vātātapa­sarīsapa­samphassaṃ; tasmiṃ kho pana senāsane viharantassa appakasirena uppajjanti cīvara­piṇḍapāta­senāsana­gilānapaccaya­bhesajja­parikkārā; tasmiṃ kho pana senāsane therā bhikkhū viharanti bahussutā āgatāgamā dhammadharā vinayadharā mātikādharā; te kālena kālaṃ upasankamitvā paripucchati paripañhati:  ‘idaṃ, bhante, kathaṃ, imassa ko attho’ti; tassa te āyasmanto avivaṭañceva vivaranti anuttānīkatañca uttāniṃ karonti anekavihitesu ca kankhāṭhāniyesu dhammesu kankhaṃ paṭivinodenti. Evaṃ kho, bhikkhave, senāsanaṃ pañcangasamannāgataṃ hoti. Pañcangasamannāgato kho, bhikkhave, bhikkhu pañcangasamannāgataṃ senāsanaṃ sevamāno bhajamāno nacirasseva āsavānaṃ khayā … pe … sacchikatvā upasampajja vihareyyā"ti.

Paṭhamaṃ.